《2025香港小姐競選》14位候選佳麗到檳城展開拍攝外景之旅，眾人隨住大隊浩浩蕩蕩喺機場出發，大家心情都好興奮。為咗喺泳裝環節展現最靚一面，佳麗們都做足準備。
1號李尹嫣就話泳裝環節係最後一日先拍，所以仲有時間可以努力，2號甘詠寧、5號曾閱遙、12號庄靜璟、13號袁文靜就努力做Gym鍛鍊好體態，又會努力戒口淨係食沙律，7號施宇琪就堅持每日跑十公里，要盡力去減。6號朱文慧嘅反應就好可愛，話希望馬來西亞熱啲，睇落去個人可以瘦啲。11號梁倩萱同樣寄望天氣，希望天氣熱可以流失多啲水份，自然減肥。
經過一晚休息，佳麗們聯同嘉賓 袁偉豪 同 劉佩玥 喺檳城巿政廳會見當地傳媒及展開拍攝。雖然天氣好熱，不過8號岳凡荻表示冇佢想像中咁熱，9號陳詠詩、10號文雅儀就好興奮喺當地拍攝睇美景，而且喺海邊有陣陣海風吹埋嚟，感覺好舒服。14號何詠多就唔太習慣喺室外拍攝，笑言「要曬曬啲雀斑出嚟。」
大部分佳麗係首次踏足檳城，大家對當地風土民情相當期待，好想趁機會見識一下。4號莫凡就把握時機影咗唔少靚相，3號蔡華英都好期待可以欣賞唔同景點。
