齊集視帝視后楊茜堯Tavia、林夏薇Rosina、陳豪Moses、馬國明Kenneth、陳展鵬Ruco仲有陳自瑤Yoyo、姚子羚Elaine、傅嘉莉Kelly 等主演嘅新劇《玫瑰戰爭》，呢日喺深圳開鏡率先同觀眾見面，陣容鼎盛。呢日亦係Yoyo嘅44歲生日，TVB娛樂新聞台主播王鎮泉Jeoffrey 特別貼心送上蛋糕為Yoyo同埋就快生日嘅茜堯慶生場面搞笑。

兩位媽媽拎住蛋糕互相送上連串祝福時，Yoyo向茜堯話：「幸福快樂，繼續老公鍚晒。」茜堯隨即衝口而出：「老...囡囡鍚晒...」之後茜堯就有啲尷尬表示：「你咁樣好陰我唧，玩嘢呀？」身邊嘅陳豪同馬明仲有兩位當事人都不斷大笑。

茜堯同馬明自《On Call 36小時》之後再度合作，劇中CP一別多年，加上茜堯同阿Mo亦都好耐冇一齊拍劇，人腳令觀眾期待，茜堯又即場考驗阿Mo佢哋曾經合作嘅作品，雖然兩大視帝當前，但茜堯一啲都唔怯場，仲話覺得依家自己企喺兩位面前自覺高咗，而馬明亦期待同茜堯及Yoyo嘅火花。

展鵬同薇薇合作無間，每次都有圓滿結局，但今次佢哋嘅關係就會打破傳統反而冇太多對手戲，各自有合作對象。見到薇薇同茜堯令觀眾想起復仇CP，但薇薇話今次二人關係會更昇華。由於好多女藝人同展鵬合作後都好快結婚，近日子羚同徐偉棟傳出戀情，所以有人建議子羚要同展鵬多啲合作會先會好事近。

鄺潔楹Judy 企喺Kelly同陳楨怡Celina 兩位長腿女神身邊好自然被比下去，不過高度呢樣嘢都唔係冇得補救，Judy真正拍攝時會以超高高踭鞋上陣，力敵咁多對長腿。Kelly表示能夠與多位視帝視后合作興奮又緊張，收到劇本一邊睇一覺得有啲焦慮，因為內容太豐富，亦期待同茜堯及阿Mo首度合作。