TVB處境喜劇《愛‧回家之開心速遞》8位演員滕麗名、呂慧儀、周嘉洛、吳偉豪、張景淳、林淑敏、古佩玲及陳浚霆喺監製梁耀堅率領下，噚日第五度前赴內地宣傳，參與一個「七夕情緣」粉絲見面會，演員合唱劇集主題曲《這個家》，並分享拍攝心得與暢談許多拍攝期間嘅難忘事。
眾演員以CP形式分組與現場逾數百位觀眾進行互動，大玩遊戲，包括KISSCAM、拋繡球、愛要說出來、歌曲接唱、幸運時間等，又透過直播與線上觀眾進行互動，最高同時在線人數達2000人，演員又喺現場教觀眾跳主題曲《這個家》嘅舞蹈，當點讚數更突破8000人後，即加碼挑戰隨機遊戲，而全體演員喺活動尾聲送出限量禮物予現場幸運觀眾，場面溫馨熱鬧。
一眾演員今次第三度到訪廣州，與內地粉絲會面，現場反應非常熱烈，現場歡呼聲不絕，逾千粉絲逼爆商場，喺現場「觀眾互動」環節中，眾演員分別進行深情告白，其中滕麗名、呂慧儀、張景淳、古佩玲、陳浚霆及林淑敏均表示能夠拍攝《愛‧回家》真係好幸福，每日開廠都好似返屋企咁，亦好感恩觀眾咁多年嚟嘅支持。
吳偉豪就好開心到廣州做宣傳，亦感恩多年嚟一直有周嘉洛喺身邊，佢笑指人生有幾多個十年，加上二人係同一期藝訓班出嚟，之後一齊拍好多戲，每一次合作都好享受，希望未來繼續有好多機會合作，周嘉洛都深情回應，表示兄弟情盡在不言中。
