處境劇《愛・回家之開心速遞》日前趁七夕，就出發到廣州宣傳，同觀眾近距離互動。滕麗名、林淑敏、呂慧儀、張景淳、周嘉洛、吳偉豪Ricco、陳浚霆同古佩玲除咗派糖派禮物，仲分別以CP組合同現場觀眾玩拋繡球遊戲，大家又一齊合唱主題曲《這個家》，氣氛相當熱鬧。
現場播出特別剪輯嘅短片，帶大家回顧《愛回家》呢8年嚟嘅精彩片段，仲以AI合成幾位演員初出道到而家嘅變化，阿蟹睇完都忍唔住眼濕濕，但佢話呢個感動嘅情緒，去到見到自己嗰條AI片後，就由感動嘅情緒中嚇醒返。
問到滕麗名最感謝嘅係咪大會冇揀到佢新秀時期嘅相嚟整呢條AI片？滕麗名就話自己只係講下笑，即使大會揀佢都唔會驚，而身邊嘅阿蟹就搞怪咁拍拍主持Cyrus黎文傑，叫佢唔好問埋啲咁嘅嘢。而大小姐林淑敏就表示，好彩大會將佢港姐時期嘅相執過，因為佢話自己選港姐時好肉酸，亦難怪當年自己選唔到呀。
自稱資歷淺嘅陳浚霆，就話自己睇完前輩嘅AI片後，先發現原來佢係睇住佢係嘅演出大，佢仲話當中嘅滕麗名，由兒歌開始到《陀槍師姐》，對方係陪住自己成長，同時亦係香港人嘅共同回憶。周嘉洛同Ricco呢對兄弟唔經唔覺就認識咗十年，趁住七夕呢日，Ricco就喺台上同嘉洛大講心底話。
完成下午活動，眾人就移師遊艇同250位fans夜遊珠江，難得可以同偶像近距離接觸，其中一位由新疆烏魯木齊嚟嘅fans，仲開心到喊。
