郭晉安、陳曉華 、羅子溢 、何依婷 、羅天宇 、郭柏妍 、陳浚霆 、何廣沛 以及 羅蘭姐 等主演嘅劇集《金式森林》10月13號首播，一眾劇中演呢日出席宣傳活動，大家又為十月之星嘅天宇同埋Rosita送上生日驚喜。
安仔今次同Hera破天荒合演夫妻，呢對CP唔單止新鮮感爆燈，戲裡戲外都亦師亦友，因為Hera拍攝時長時間同安仔一齊，可以偷師獲益良多，而且好多網民都好鍾意佢哋呢對CP，令Hera同安仔都好開心，安仔更笑指有仔有女有老婆梗係開心。
Hera同安仔喺劇中譜出忘年戀，而現實中佢同朱敏瀚嘅緋聞亦漸漸浮面，繼之前被指同遊日本後，日前又被捕捉到一齊去睇關智斌演唱會，Hera對此笑笑口指當日仲有蔡思貝、賴慰玲，指呢次主要係去撐囝囝場，因為佢有份上台表演，之後隨即借身邊嘅安仔過橋解圍，並大耍太極話：「今日開始我有老公，大家唔好再講其他男人，唔尊重呀﹗」
安仔同Hera劇中嘅感情線令人引頸以待，而另一邊嘅Regina，呢次會周璇係子溢同廣沛之間嘅三角戀，依婷同子溢嘅火辣床戲一定衝擊觀眾眼球，不過講起呢場戲時，子溢竟然斷咗片，仲反問其餘兩位當事人「你哋有床戲咩？」
及後子溢解釋經驗較多所以唔記得，認為拍呢類戲最緊要令對手舒服，依婷亦大讚子溢可以封床戲專業戶：「好快手，一Take過連我都唔知就搞掂咗，導演叫埋cut。」子溢笑指依婷嘅答案可圈可點，其實唔係快，係細緻精準至啱。
《金式森林》10月13號起 星期一至五晚 21:30 翡翠台