視后 胡定欣 年初公開認愛，同外科醫生 陳健華 墜入愛河，令唔少人都戥單身已久嘅佢非常開心，而定欣更喺中秋節人月兩團圓嘅好日子，突然放閃公佈已同陳醫生結成夫婦，公開浪漫到暈嘅婚禮現場相片，令節日更添浪漫氣氛。
定欣於社交平台分享10月3日已經成婚嘅消息，兩人於新西蘭一個知名酒莊嘅結婚場地舉行婚禮，之後更意猶未盡再公開同老公攬到實嘅甜蜜合照，仲寫道：好時辰先找到你 天公對待我真好」，真係Sweet到糖尿呀。
而被指再建一功嘅金牌媒人 林盛斌 ，出席綜藝節目宣傳時，自然要回應自己又成功撮合一對佳偶嘅威水史喇，阿Bob直指一早收到定欣訊息，當中充滿住喜悅﹐之後睇到現場相片就更加戥一對新人高興，仲叫佢哋要趕工造人，晚晚大戰就啱咁話喇。
佢又提到首次經 洪永城 認識 醫生後，早就決定要撮合定欣，一個飯局後就慢慢認識再發展，更不時同Tony追問進度，期間已感受到兩人嘅甜蜜戀情喇。阿Bob仲話一對新人如果補擺喜酒，自己要拒絕擔任司儀，仲笑言隨時新人要斟茶俾自己飲呀。
而過往曾同定欣拍拖嘅 馬國明 ，呢日知道喜訊後亦大方送上祝福，祝福一對新人白頭到老，仲話完全唔知定欣籌備婚禮嘅消息，相信只得最親密嘅「胡說八道會」成員會知道內情，但係近日同 姚子羚 合作拍攝時，亦完全未察覺有異樣，保密程度100分呀。
定欣過往曾同 吳浩康 馬國明 拍拖，唯未能開花結果，之後亦曾經與圈外人同幕後人戀愛，惜一樣無疾而終。定欣曾於節目受訪時，認為自己將會孤身生活，認為識男仔難、拍拖就更難，幸最終與陳醫生共諧連理，揭開人生新一頁。
