馮德倫 回歸演員身分，參演由 爾冬陞 監製嘅新戲。Stephen喺戲中周旋喺 周秀娜 胡杏兒 同袁澧林 之間，飾演Stephen太太嘅Chrissie話，今次合作令佢好緊張，事關佢人生第一次拍劇就係Stephen自編自導自演嘅《老馮日記》，估唔到第二次合作，二人升級做夫妻。Stephen笑稱自己係獨具慧眼，認為Chrissie係可造之材。
Stephen嘅太太 舒淇 憑首次執導電影《女孩》勇奪釜山影展最佳導演，Stephen祝賀太太之餘亦搞笑投訴太太獎座太多，搞到自己啲公仔冇位擺。至於被問會有咩獎勵俾老婆，佢就話呢個獎已經係最大獎勵，冇嘢可以超越喇。
杏兒嘅好姐妹胡定欣早前宣佈婚訊，不過胡說八道會嘅好姊妹全部都未受邀參加，杏兒都坦言知道定欣一定好忙，所以唔想俾太大壓力對方，仲呼籲好姊妹記得要搵佢添！杏兒仲話，雖然金價好貴，但可以考慮下打返對龍鳳鈪俾定欣呀。
