蔡一傑接受腦部手術休息一年後，終於以大勇姿態歸隊現身草蜢巡演新加坡站嘅舞台，開騷前蔡一智就喺後台與眾人高呼「蔡一傑 強勢回歸」，以振士氣。
騷後蔡一智再次恭喜蔡一傑順利回歸舞台，佢形容呢晚嘅觀眾相當投入，彷彿係賀佢回歸舞台。蔡一傑話已經有一年冇上舞台，自己都係用一個平常心去上台，佢又話可能會有朋友擔心佢重踏舞台嘅情況，但佢就大派定心丸，指同以前上台無咩分別，叫大家唔駛擔心佢呀。
演出當晚適逢係草蜢已故髮型師兼好友Jacky Ma嘅生忌，三子以歌聲緬懷故友，又自爆喺綵排時已經忍唔住落淚，蔡一智話因為導演安排播出大量佢哋嘅合照，估唔到綵排時自己只係想回頭望一眼，就已經唱唔到落去，所以佢哋三個都話，喺正式開騷時點都唔敢回望身後嘅大屏幕。
