黃劍文最近密密接Job，嚟近會同中聲成員去新加坡出騷。日前Kimman出席「香港音樂劇節 2026」記招，佢所主演嘅音樂劇以哥哥張國榮為故事主題，將同一眾演員即場演唱哥哥嘅《Miss You Much》。
音樂劇即將喺明年初再度公演，雖然Kimman要面對唱、跳、演會覺得緊張，不過有咗第一次經驗後，佢心情興奮，亦好開心可以同演員們重聚。
Kimman嘅外公早前離世，出席完告別儀式後，佢喺社交平台貼出多張合照懷緬外公，仲話外公教識咗佢好多嘢，特別係「堅強」，自己亦從公公身上感受同學識「愛」。
Kimman最近返咗中學母校演出，令佢諗返起少年時期嘅暗戀往事。Kimman就話當年暗戀嘅女仔同自己同姓，仲要係同年同月同日出世，所以有段時間都會搵呢個女仔玩，暗戀到最後亦變做明戀，不過呢位同學最後出埠讀書，而家已經結咗婚喇！
