日前先參與2026TVB節目巡禮；早前又先後飛到馬來西亞同澳洲宣傳嘅 張振朗 ，趁住萬聖節周末扮鬼扮馬出巡蘭桂坊，一件簡單白袍加上驚嚇表情，已令尚未出發嘅Owen玩到癲，女友 楊偲泳 幫佢拍片時亦提供滿載嘅情緒價值，熄晒燈幫手拍片，又大嗌「好恐佈」，而開心到爆嘅Owen就不停亂跳，搞到Renci同好友笑佢發神經。
Owen之後去到塞滿人嘅中環玩返餐，仲不停被途人邀請合照，不過相信冇人會估到眼前打扮唔算花心思嘅「嘩鬼」，原來就係不時喺電視出現嘅視帝朗喇。
出門盡情發洩之前，原來一眾好友先為下周四踏入「29＋2」歲嘅Renci預神生日，相片中大部份朋友都扮鬼扮馬，唯獨Renci保持住鬼火咁靚嘅樣貌，亦可見嘩鬼Owen手捧蛋糕低調齊齊合照少曬甜蜜。
