澤演喺社交平台發表喜訊，表示即將同交往多年嘅圈外女友步入婚姻殿禮堂，更形容：「她是長久以來一直理解並信任我的人，我們承諾要成為彼此最堅強的依靠，共同攜手走過未來的人生。」消息一出，令粉絲們又驚又喜！
澤演透過親筆信表示，自己由2PM身分出道至今已經19年，感激歌迷陪伴，自己先可以喺演藝路行到今日。亦因為歌迷一路支持同愛錫，所以決定結婚當然應該第一時間親自同大家講：「一直以來你們的愛和支持給了我無法言語形容的巨大力量，我未來也會繼續以2PM成員和演員的身分，努力報答你們對我的愛與信任。」
根據澤演嘅經理人公司透露，婚禮預定喺明年春天舉行，地點不公開，只表示喺首爾某處舉辦，屆時只邀請雙方家人、親戚同親近友人低調出席。女方係圈外人，有指係喺一般企業任職嘅上班族，所以婚禮將採取完全非公開嘅方式進行，也希望各界體諒及給予祝福。
其實澤演喺2020年6月就被媒體影到同與圈外女友喺江原道平昌嘅牧場約會，隨後佢大方承認戀情。今年年初，更有人喺法國巴黎影到佢疑似浪漫求婚嘅畫面，當時經理人公司澄清澤演只係為慶祝女友生日影相，並非求婚。但事隔未夠一年，二人官宣步入人生新階段。
