台慶劇《巨塔之后》於10月31號晚迎來大結局，一眾台前幕後呢晚就相約埋一齊飯聚兼收睇大結局。被網民封為「胃酸CP」嘅陳煒同宣萱當然要派下福利，齊齊擺出雙心心合照，不過全晚最令大家高潮嘅，就係古天樂突然出現，搞到唔少網民都留言問如果《巨塔之后》有續集，可唔可以請埋古仔嚟客串呀！
宣萱、陳煒、蔣家旻、吳若希等都陸續將呢晚嘅飯聚照上載到社交平台，當中宣萱更喺帖文中表示唔捨得呢個劇組：「不捨. 多謝大家給我美好的回憶❤️❤️❤️」而蔣家旻亦上載多張與眾演員嘅合照，但係封面與古天樂、宣萱及游學修嘅四人合照就相當耐人尋味，原來當晚《巨塔之后》眾人享受緊結局飯時，喺附近嘅古仔得知後，即與游學修一齊過嚟打招呼，所以先有眾人與古仔嘅合照。
重溫《巨塔之后》精彩內容
而「77工作室」亦將當晚嘅片段剪輯咗擺到社交平台，宣萱喺飯局中提到接拍《巨塔之后》嘅因由，佢表示：「如果阿佳唔係一個有要求嘅監製，我唔會接，係講真㗎！」而出場無耐就墜機身亡嘅鍾鎮濤，就笑言：「點解咁短㗎呢，早知道拍多啲啦。」總監製鍾澍佳則衷心多謝台前幕後眾人。除咗有宣萱、B哥哥等發言外，臨近片尾楊證樺一句「我哋續集見啦」更令網民紛紛猜測《巨塔之反》係咪會有續集，唔少網民留言建議拍續集或者前傳，亦有「胃酸CP」嘅粉絲留言力撐佢哋再次合體演出。
