經過數個月以來嘅不同激烈競爭後，入圍8強嘅 甄敏芳 蕭凱恩 胡子貝 周智敏 林潔心 穎喬 馮熙燮 仲有 柯雨霏呢晚喺《聲秀決賽 終極聲戰》最後對決，結果由 馮熙燮 勇奪冠軍、柯雨霏緊隨獲亞軍，而季軍同觀眾熱選聲秀大獎則同樣由胡子貝獲得。
《終極聲戰》 一開始由各被淘汰位學員同導師以一曲《星戰》表達對追求夢想嘅期盼，之後8強學員亦現身合唱。決賽首回合為「廣東歌代表我」，由7位專業音樂人組成專業評審，加上20名DJ以及KOL、加上觀眾投票及網上純享點擊次數，最高分兩名學員晉級第二回合。
Ziva穎喬 先打頭陣演唱《Taxi》佢以火辣低胸打扮同舞者一齊演出，令現場即時熱血沸騰。而一直被視為大熱嘅 Jenny甄敏芳 就以全黑打扮喺整個舞台嘅燈泡包圍下，演唱《愛與痛的邊緣》。
緊接於網上投票一直位居前列嘅 胡子貝 出場，自彈自唱《無盡》，皮樓加手套盡騷佢Rock爆一面。 Bibi林潔心 之後就以一身優雅長裙現身，獻唱慘情歌曲《今天終於一人回家》。之後就輪到 Ophelia柯雨霏 以一身淺啡色紗裙獻唱《荊棘海》迎戰決賽。
另一大熱門 Emily周智敏 之後以一身露肩短裙出現，演出極具節奏感編曲嘅《隆重登場》。緊接就由自古典樂跳出框框嘅 Michelle蕭凱恩 ，以佢絕妙聲線獻唱《李香蘭》。首回合最後一名演出嘅，就係另一位男學員 Ryan馮熙燮 以一首《小心地滑》應戰，展示佢狂野嘅一面。
8名學員經過首輪自選廣東歌對決後，胡子貝 以21.52%獲得觀眾熱選聲秀大獎，首回合最終分數亦由子貝得季軍，而 Ryan馮熙燮 同 Ophelia柯雨霏 就殺入第二回合。
Ophelia同Ryan一對一決鬥，兩人分別獻唱泳兒嘅《葉落冰川》同陳奕迅嘅《七百年後》，互相比拼唱功。最後由評審逐一按燈宣佈賽果，最後由Ryan以6：3勝出，成為《聲秀》終極冠軍。
