第15屆全國運動會即將於11月9號隆重登場，TVB將會帶全港市民直擊精彩賽事，呢日全運會主持聯同一眾藝員齊齊去到商場宣傳為全運會熱身，中聲唱將 黃博、 曹越 同 李創偉 仲獻唱炒熱氣氛，原來幾位除咗唱歌叻，佢哋運動都有一手！
黃博表示自己鍾意游水，所以都相當關注游泳項目，佢話覺得喺水下成個人都得以放鬆，甚至能夠聽到自己嘅心跳聲。曹越就表示平時會相約 趙浚承 、羅逸軒 等一齊做運動，而稍後佢將會同李金凱、 趙浚承一齊報名參加馬拉松。而平時有跳開舞嘅李創偉，就表示好明白運動員嘅感受，所以一定要支持運動員。
活動上藝員同觀眾即場挑戰做運動，兩位港姐 郭珮文Juliana 同 邢慧敏Sharon 原來喺學生時期都係運動健將，不過Sharon話由於自己 From 2時已經長到175cm，所以自己先停咗做運動無加入校隊打籃球，只係間中玩下，佢笑言好驚自己生到 180cm高，到時會冇人要呀。學生時期係泳隊嘅Juliana，已經有一段時間冇同觀眾見面，佢就表示喺呢段時間有好好增值自己，另外亦有學騎馬同打高爾夫球。
羅天宇 同 丁子朗 就喺現場晒手臂舉啞鈴，天宇話由於自己想瘦啲，所以而家反而少咗做gym，轉為打籃球同高爾夫球，佢笑指自己每逢開劇，體重都會減得好快，但一拍完劇體重就會直線上升。丁丁就話自己最近迷上踩公路單車，身邊嘅天宇就指套單車服只得丁丁可以carry到。
