「中聲歌手」羅啟豪同歌迷會主辦嘅親子嘉年華「小鬼大作戰」，大受家長與小朋友歡迎。嘉年華最後一日，啟豪親臨會場獻唱大會主題曲《小鬼主意》，親自落場同大家玩遊戲、落力推介唔同社企產品，為嘉年華畫上圓滿句號！
一眾歌迷為活動出心出力，令啟豪倍感自豪，亦好感動大家每次舉辦活動嘅目標係面向公眾、積極行善。短短個半月時間，就籌劃出呢個大型活動。設計師出身嘅啟豪亦喺百忙中負責設計主題角色「功課鬼」、「牙刷鬼」、「青椒鬼」及「鬧鐘鬼」。
嘉年華圓滿結束後，啟豪立即全力投入第二次個人演唱會嘅籌備工作，佢表示：「歌單已差唔多落實，上次主要講我嘅故事，回顧我喺《中年好聲音》所唱過嘅歌，但今次會選唱大家意料之外嘅歌，包括唔同語言與曲風。」
演唱會如箭在弦，啟豪喺月中就要飛到美國，夥拍蔡思貝、羅子溢、王鄭浚仁登台。既應付美國演出，又要開始排練香港個唱，啟豪忙到冇時停：「又未至於分裂，但確實唔可以完全放低香港演唱會，兩個騷要同步進行，籌備美國演出之餘，要開始先練香港演唱會歌詞。」
