萬眾期待嘅台慶劇《新聞女王2》將於11月10號喺翡翠台播出，劇組近日作出密集式宣傳，Man姐佘詩曼聯同總監製鍾澍佳飛到北京宣傳。唔少內地觀眾睇完第一輯之後，對《新聞女王2》充滿期待。
阿佘承認拍第二輯時壓力比第一輯更大，因為第一輯時觀眾未有講出對劇集嘅要求，但嚟到第二輯就會有期望。
呢次Man姐再次強勢登場，戰意高昂，劇情講述Man姐離開SNK自立門戶打天下。阿佘話受Man姐嗰份終身學習嘅態度同熱血嘅精神啟發，亦係佢本身嘅態度，因為無論喺任何年紀同時間，都要不斷去學習。
阿佘首次同黃宗澤合作，但兩人喺劇中都充滿火花兼火藥味，每次同Bosco對戲要鬥智鬥力，因為大家鍾意喺現場創作嘅人，所以好多時都改劇本，等彼此可以你一言我一語咁鬥嘴，充滿化學作用，阿佘爆原來Bosco劇中角色Kingston嘅由來係有段故。
