王子 邱勝翊 日前被 范姜彥豐 公開指控以第三者身份介入婚姻，同老婆粿粿發生婚外情。陷入醜聞風波嘅王子，唔止被公司出聲明指將全面停工，佢亦再喺11月4號晚經社交平台公開律師信，繼而喺留言區作出第二次嘅道歉聲明。
700多字嘅聲明中，王子寫足7次「對不起」，佢指：「錯就是錯沒有任何理由跟藉口，從⼀開始到現在我都是真⼼⾯對， 在此風波發⽣前協商會⾯的時候，我有親⾃向范姜先⽣當⾯鞠躬道歉並多次商討賠償⾦額，我在此公開、慎重的再次向范姜先⽣與粿粿道歉。」
王子強調自己犯錯要付出代價，所以一直冇逃避協商，佢亦寫出自己有提出過去為父親清償債務嘅相關證明，希望對方了解索償金額對佢嚟講係超過負荷，兼且洽談分期付款，可惜雙⽅共識不同，未能達成對方期待。
因私生活出現問題，王子已經被公司宣布全面停工，甚至連內地演唱會亦取消。無獨有偶，王子嘅細佬「毛弟」邱宇辰，亦喺噚日（4日）宣布，原定月中舉行嘅福建演唱會延期。
