TVB長壽節目《歡樂今宵》雖然告別觀眾多年，但節目元老每年都會舉辦EYT聯歡晚宴聚首，呢晚胡楓、羅蘭姐、余慕蓮、盧海鵬、鄧英敏、林嘉華、詹秉熙、潘芳芳、盧敏儀、陳榮峻同太太吳香倫、凍齡女神張鳳妮、仲有前金牌監製李添勝、潘嘉德等近二百人現身場面墟冚，眾人更合唱《晚安歌》。
修哥登場時更大受老友歡迎，個個都爭住同佢合照，修哥都話大家見到自己嘅時候一直笑口常開，令佢都好開心。呢個聚會亦係修哥每年最期待，見到老朋友們個個都好後生，至於自己年紀大，但心境同樣年輕。
早喺80年代已經亮相EYT嘅李有毅，今次就帶埋阿仔李國煒一齊嚟感受一下呢個大家庭。李有毅就話阿仔都係EYT之友，細細個已經喺EYT出現過。李國煒作為「中聲」歌手，令爸爸都話講到唱歌完全唔及阿仔，亦係阿仔同佢講，先知有呢啲大型比賽。
黃澤鋒嘅細女出生後，佢幾乎與世隔絕閉關湊小朋友，呢晚見返咁多老友特別開心，更幸福分享全職做奶爸狀況。澤鋒就話囡囡食人奶，所以老婆兩個鐘要餵一次，自己都要抱囡。佢仲話，而家嘅小朋友都好聰明，雖然只得兩個月，但聽到自己行近就會喊大聲啲扭計要爸爸抱。
