《中年好聲音3》唱將 王鄭浚仁 型爆現身錄影廠，為人生首支單曲《我就是舞台》拍攝MV，新歌係為Rax度身訂造，完全道出佢由參賽、畢業到成為歌手嘅追夢之路。講到新歌需要挑戰舞步，佢都直認唔易跳，仲要喺有限嘅時間內學識。而新歌除咗國語版之外，仲有英文版，因為歌曲本身節拍性好強，如果再做多一種語言，可以提升到另一個層次。
為咗配合歌曲內容，Rax先後以幾個造型現身MV當中，而每個造型都係呈現不同感覺。MV中除咗有四位舞蹈員，仲加入四位靚女演員一齊演出，如此龐大拍攝陣容，Rax自覺好幸福同感恩。
推出首支單曲，同時代表Rax正式出道進軍樂壇，踏出重要一步，佢期待新歌會受大家喜愛，亦希望可以多啲現場表演，親自演繹新歌畀大家聽。
