周國賢 黃妍 柯雨霏 林智樂現身音樂節目《J Music》，啱啱簽約新唱片公司嘅Endy就帶埋新歌上節目，又同黃妍合唱。Endy分享，簽約新公司後，佢希望可以調整創作步調出多啲好歌。至於講到最想同公司邊位藝人合作？佢就話，其實公司每位藝人都係佢想合作嘅對象，但講到最想嘅一位，就係謝霆鋒喇！
黃妍帶新歌《枇杷》嚟到節目，Cath解釋歌曲喻意，因為人越嚟越大，就會越唔敢講真話，所以佢希望大家可以有講真話嘅勇氣。而歌名之所以會叫《枇杷》，係因為Cath好鍾意枇杷膏，每逢出騷前都會靠佢潤喉，所以作詞人就拎咗枇杷做歌名。
Ophelia喺個人單曲《直覺型美學》造型奪目大膽，佢除咗喺音樂上渴望有新嘗試外，仲好想試下主持旅遊、飲食節目，又自認好鍾意推薦介紹，更向鏡頭同公司許願，希望可以心願成真。
《J Music》星期六晚 22:00 翡翠台