4月24號係陳家樂同連詩雅結婚三週年紀念日，兩公婆踏入凌晨12點同時喺社交平台出post，慶祝呢個大日子，真係sweet到爆。 Shiga post咗一張同老公喺街頭嘅合照，佢一手環抱住老公，甜笑望住鏡頭，雙手舉V字手勢，而家樂就側面入鏡，chok住望向前方。Shiga簡單寫下「三週年，Bitter and sweet. Love you.」
家樂就post咗一張兩公婆出席電影頒獎禮嘅合照，家樂攬住Shiga條腰，好深情望住老婆，Shiga亦sweet爆望住老公。家樂感性分享三年前一段兩公婆嘅對話，Shiga對老公充滿信心，相信老公一定可以攞獎，家樂亦承諾拖住老婆行紅地氈，同埋喺台上多謝佢，「3年後連小姐已成為陳太，3年後陳先生拖住陳太行紅地毯，雖然後面嘅承諾未做到，但多謝你嘅『一定就係一定』，一定一定」。
另外，家樂仲post咗一張Shiga嘅手繪卡片，卡片封面寫住「老公」加上一顆愛心，雖然家樂冇公開卡片內容，但佢話睇完之後笑到收唔到聲。
