香港魔術師甄澤權（Louis Yan）去勻世界好多大型魔術舞台表演，即將成為全球首位華人魔術師踏上紅館開個人騷，呢日Louis作客TVB娛樂新聞台 《StarTalk》，一直覺得做魔術師要有自己節目、做世界巡迴及攞獎項，坦言喺紅館表演係Checklist嘅終極目標，得知成功批出檔期時，Louis心情既興奮又開心，令其魔術人生更完美！
Louis預告將上演超危險魔術，呢個係十大危險魔術嘅第一位，不惜以性命演出，皆因做呢個驚險表演喺歷史上有12位魔術師失手喪命，Louis仲話呢個表演喺香港冇人做過。問到家人會唔會擔心時，Louis話佢哋都冇辦法，希望將自己最好嘅一面呈現。
主持 王鎮泉 話自己讀大學嗰陣，作為師弟已久仰Louis大名，指學長Louis係大學魔術榮譽會長，將興趣變成事業，Louis亦自覺其魔術之路好幸運。
Louis承認魔術行業收入唔穩定，喺疫情開始嗰陣感受最深，當時真係停晒工作，要諗點樣維持一個穩定收入去養家，一來魔術表演市場唔係好大、二來呢個職業唔太穩定，下一個方向係諗，譬如好似外國咁有個地方可以長期表演，未來想朝住呢個工作方向努力。