李家鼎、細仔 李泳豪 同大仔 李泳漢 之間嘅風波成為全城熱話，即使 施明 嘅喪禮已經完結，但父子、兄弟間嘅矛盾越演越烈，豪仔更得到唔少網民以及處境劇《愛・回家之開心速遞》一眾演員同事嘅關心及支持。
近日豪仔喺個人影片頻道拍片同大家分享近況，感謝連日以嚟為佢同鼎爺打氣嘅朋友與網民，亦表示自己會繼續摸索經營呢個頻道嘅方式，目前處理驗證帳號階段，亦會積極尋求朋友協助解決技術問題。
其實唔少網民都支持豪仔同爸爸父子檔合作拍片，豪仔都喺片中表示：「會嘅，一定會嘅！你話煮餸又好買餸又好，甚至聽吓爸爸講故事，我都會拍嘅。」不過佢就話一切都要等鼎爺身體再好啲先，鼎爺話OK先拍。豪仔仲話，等鼎爺精神狀態再好啲就開直播，大家同佢傾偈問問題。
豪仔自認喺搞網上頻道呢件事上係白紙一張，所以都想試試做聯播，跟其他影音創作者學嘢，亦樂意收到大家嘅意見，仲話大家想睇咩類型嘅片都可以用留言或私訊方式同佢講。最後豪仔再次感謝大家嘅關心同祝福，亦祝大家身體健康、開開心心。
