年度籌款晚會《明愛暖萬心》於7月11日（星期六）晚上8點半喺翡翠台現場直播。趙增熹擔任音樂總監，呢日率領一眾表演歌手聯同管弦樂團一齊進行綵排，戴祖儀同張馳豪（Aska）早前喺《飛常日誌2》被網民封為「太后奴才CP」，呢次首度齊齊擔任慈善節目司儀，二人更有機會一展舞技。
戴祖儀自認係「舞痴」，對於可以好快排練完，戴祖儀話得到排舞師愛錫，啲動作好簡單，戴祖儀又指Aska係跳舞，自己只係做動作，但Aska卻畀拍檔100分。
周吉佩、胡鴻鈞及潘靜文（Sherman）當晚各自演繹自己歌曲，仲會一齊合唱一首好有意義嘅作品，希望藉着呢首歌帶出正能量。同場有張與辰、谷婭溦同韋綺姍（Rita老師），呢次與辰同溦溦合唱側田經典歌《命硬》，與辰話自從出院後，作息時間有調整過，身體狀況好好。
盧冠廷（LoLo）呢次自彈自唱《陪著你走》，佢話有啲力不從心，指自己彈咗幾廿年，啲手指都係唔聽話。
