《好聲好戲》第二季圓滿結束，一班參賽藝員呢日到錄音室喺資深配音員龍天生指導下，為畢業作品《 蜘蛛俠：不戰無歸 》配音，袁文傑殺入決賽，表現不俗，呢次聲演重要角色「奇異博士」，獲天生哥讚賞節奏OK，袁文傑多謝幕後製作組，願意揀佢去配呢個角色。

作為主持嘅阮兆祥聲演至尊魔法師「王」，佢開心稱跟天生哥學到嘢，有時動作戲被考起，譬如拎重嘢到放低啲嘢，語調同呼吸都唔同，得到天生哥指導坦言長知識。

同樣中文程度有限嘅姜麗文同蘇韻姿今次挑戰喺劇本唔寫英文拼音，姜麗文覺得幾好玩，佢笑言拍完《白色強人II》感覺進步咗，而黃嘉樂亦開心克服咗心中對配音嘅恐懼。想知佢哋配成點，就要留意10月15號晚上8點半翡翠台首播。