Gigi(炎明熹)夥拍Windy(詹天文)及Archie(冼靖峰)為《聲夢傳奇》兩代學員合作新歌《 Hat Trick 》補拍MV畫面,炎明熹早前不幸確診,康復後即開行tempo,Gigi埋位表現精靈活潑,不過呢首歌舞步有啲難跳,所以Gigi有少少甩beat,忍唔住傻笑,Gigi叫師弟師妹跳舞唔好跟佢偷師,佢笑笑口說:「我係完全跳舞真係麻麻,信我!我記得我學跳舞嘅原因非常搞笑,開始學唱歌先學跳舞,12、13歲左右,跳嗰啲流行爵士,老師教相當複雜嘅動作,我學跳舞原因係想喺台上郁吓,因為我上台唱歌完全(站)咁樣唱,我係完全唔會(郁動)、唔會行咁。」原來Gigi係想改善台風先學跳舞!
Windy事前上咗兩個鐘堂惡補舞技,返屋企都有記吓啲step,Archie亦有練過舞步:「我比佢更加差,我有上過15分鐘,然後要趕去綵排,學咗啲啲就走,靠自己睇片。」講到《聲夢2》決賽在即,佢哋同觀眾都期待冠軍誕生,趁機為學員打氣,師姐Gigi讚佢哋厲害,又會喺社交網問一啲問題,Gigi有逐一回答,同佢哋講加油,希望佢哋即使面對壓力,然後享受呢段學習過程,令自己更上一層樓;而Archie叫師弟妹盡力演出,Windy指《聲夢2》XiX成員有主動搵佢傾偈:「有問我當時嘅經驗,同埋點樣紓緩緊張,做好舞台(表演),唔使諗太多。」