台東縣17號晚發生嘅6.4級地震,連香港都有市民感受到震動,天文台事後就指,香港感覺嘅震感大概係身旁有大型貨車經過嘅程度。
不過如果人越近震央,感受幅度自然就會大得多喇。好似原定5月就會喺高雄巨蛋開騷嘅田馥甄,先係因為疫情影響延期到9月11號,點知開騷前一日佢又因為身體抱恙要再延期一周,到16號先可以正式開騷。
一連兩場嘅表演,去到17號晚,又撞正台東縣發生地震,據報高雄亦有4級,現場震感強烈,仲一度中斷表演15分鐘,好在現場觀眾、工作人員同器材方面都冇問題,事後先繼續演出咋。
Hebe本人都話今次真係開騷夠晒曲折,仲係入行21年以嚟第一次遇到地震呀。而由韓國返台灣過中秋節嘅TWICE成員周子瑜,呢晚亦都係觀眾之一,不過佢就非常低調咁欣賞演出喇。