《痞子殿下》開續集獲粉絲贈Q版公仔祝賀 陳瀅爆朱敏瀚增肌做新劇男一

《痞子殿下》因劇情爆笑，令觀眾睇得非常過癮，無論口碑同收視均交出亮麗成績單，唔少觀眾都話好唔捨得，監製宣佈正籌備開拍續集，周嘉洛、朱敏瀚、陳瀅同王灝兒（JW）出席粉絲見面會，吸引大批粉絲現身，有粉絲聲稱睇咗該劇十次。

《痞子殿下》幾位主角因拍劇而成為好朋友，私底下經常約食飯見面，主角周嘉洛對於原班人馬再拍，佢大感興奮：「以我所知，監製而家忙到甩轆，暫時未開始諗續集嘅嘢，佢哋完成手頭嘅嘢，就會好全力去諗。」JW透露四人喺拍攝期間已恨開續集，佢解釋知道編審好唔得閒：「如果真係開拍第二集，通常等一、兩年後先有機會，原來《痞子殿下》嘅威力，我哋可以『搶個編審』，所以覺得呢一下最開心。」

周嘉洛喺聚會上唱主題曲，笑指粉絲經歷過呢一次，應該續集主題曲唔會再想佢唱，周嘉洛覺得要唱就大家一齊唱，活動上佢哋仲收到粉絲送嘅Q牌公仔，陳瀅大讚好精緻：「真係著套劇嘅衫，好感動！我第一次收到咁sweet嘅禮物。」身旁嘅周嘉洛覺得陳瀅嘅Q版公仔整得特別靚，周嘉洛搞笑地說：「頭先唔覺得甩咗褲，跟住我發現佢(公仔)屁股好豐滿，同埋有肚臍。」

朱敏瀚由「御用細佬」默默耕耘升呢做最佳男配角，近排有傳佢將會擔正做男一，夥拍王敏奕拍攝以AI為題材嘅新劇《虛擬情人》，佢直言開心：「感覺都係好似以前咁，當係一個角色去做，冇話因為佢係咩位置，我都係盡力，難度係高，我了解之後，應該係我演繹過要做最多功課嘅角色，一路準備緊。」陳瀅同JW即起哄，稱朱敏瀚已增肌變大隻，笑指佢非常有自信，朱敏瀚解釋：「拍《痞子》之前，我自信好低，我所有嘅自信都係由佢哋嚟。」