李佳芯聲演鬼上身獲激讚 6號戲味欠奉 汪明荃狠批：你做番主持好啲

TVB聲演真人騷《好聲好戲》進入第三輪，出賽藝人李佳芯（Ali）、袁文傑、陸浩明（6號）及黃俊豪，爭奪晉身決賽嘅最後一張入場券，睇到觀眾好肉緊！

Ali喺熱身環節表現出色，首回合比賽保持水準，Ali聲演《執到寶》黃韻詩被兩隻鬼上身嘅場口，再次一人分飾兩角，挑戰高難度「雌雄同體」，聲演「唱大戲男鬼」及「重口音女鬼」，Ali輕鬆駕馭兩鬼，獲得11盞綠燈滿分佳績，龍天生大讚佢第一粒音已經似黃韻詩。

6號則聲演《溏心風暴》阮兆祥被逐出家門嗰場，6號咬字發音保持水準，惟配音時「戲味」欠奉，阿姐狠評：「係進步咗好多，但做戲就唔同囉，尤其用把聲嚟做戲，你兩樣都未到，你都係做番主持好啲！」6號事後受訪時坦言心都裂埋；黃俊豪今回合再度失準，阿姐斥「有懶音又甩嘴」，黃俊豪大受打擊，一度哽咽直指「壓力大」。

第二回合「技巧聲演」，四位參賽者須聲演格鬥場口。6號及黃俊豪聲演《鹿鼎記》劉德華與梁朝偉打架場口，潘文柏指二人都甩嘴、食唔到個戲位，Ali孖住袁文傑上演《鐵拳英雄》「猴子偷桃」場口，袁文傑聲演「男人最痛」表現出色，獲讚「真係做到嗰種痛」。綜合兩個回合成績，Ali奪得7票暫時領先排第一，黃俊豪「捧蛋」包尾。今晚一集進入第三回合「拍檔聲演」，四位接受特訓後，分別聲演阿姐作品《野蠻奶奶大戰戈師奶》許紹雄、《男親女愛》鄭裕玲、《公主嫁到》陳豪及《回到未嫁時》黎明。今晚即出現節目開播以來首個「奇蹟得分日」，記得留意！