陳慧嫻宣佈加盟《我們的歌4》 晒經典造型照及手繪自畫像

陳慧嫻（Priscilla）近年養尊處優，鮮有在港公開露面，盛傳陳慧嫻今年銳意開拓內地市場，預計暑假將強勢復出，等咗一段時間，陳慧嫻公佈新動向！

原來陳慧嫻重磅加盟內地音樂綜藝節目《我們的歌》第四季，節目將於9月25號開播，未知佢會唔會獻唱自己嘅經典歌《千千闕歌》、《跳舞街》 、《人生何處不相逢》、《傻女》等。

陳慧嫻與新生代歌手攜手改編金曲，為觀眾送上多個驚喜。陳慧嫻喺社交平台晒出紅衣造型舊照及手繪自畫像嘅短片，網民直呼：「夢回《千千闕歌》現場。」不少歌迷非常期待佢喺台上嘅表現，同時大讚陳慧嫻除咗唱得， 畫畫都好勁。

陳慧嫻喺微博晒出演唱會舊照，並手繪於1989年演唱會上《千千闕歌》經典造型自畫像。當熟悉旋律再次響起，一眾網民睇完短片後均表示「黃金時代的港樂DNA立馬動了」、「陳慧嫻的《千千闕歌》是永遠的經典」。

此外，英皇娛樂集團營運總裁霍汶希（Mani）喺社交平台post探班時與慧嫻嘅合照，Mani讚陳慧嫻狀態滿分，期待佢喺《我們的歌 4》演繹更多好聽嘅歌曲，陳慧嫻亦表示當日傾偈好開心。