琦琦陳法蓉任港姐評判 邢慧敏期待與黎明同台贈金句

9月25日就舉行決賽嘅《2022香港小姐競選》，呢日喺海洋公園酒店舉行宣傳活動，兼宣佈當晚「最上鏡小姐」嘅評判人馬，當中有名模琦琦、港姐冠軍陳法蓉、甘國亮、楊傳亮太平紳士同因為工作而未能到場嘅周勵淇。

活動上陳法蓉仲主動同一眾師妹交流，而其餘幾位評判就趁機近距離睇清一眾佳麗。問到幾位評判有咩貼士畀咁多位候選佳麗？琦琦就話到時一定要做自己唔好造作，而陳法蓉就叫大家要放鬆心情。佢仲分享當年參選時，第一次見傳媒嘅經歷，佢話當時自己緊張到嘴角不停跳，開頭仲好擔心拍出嚟嘅訪問，會畀人睇到佢嘴角跳，但幸好出行嘅訪問片段完全唔覺眼。

今屆香港小姐邀得天王黎明擔任表演嘉賓，一眾候選佳麗都表示相當興奮，當中13號邢慧敏就話好期待決賽當晚金句王黎明可以贈大家金句。而8號林鈺洧就話事前公司冇預先透露黎明做表演嘉賓嘅消息畀佢哋知，又話當晚可以喺後台望住對方唱歌已經好心滿意足。

17號張靜婷被指多年前喺社交平台爆粗，呢日佢就解釋個平台係同幾位朋友共用帳號，所以自己並唔知情，佢又話喺自己號社交平台上十幾年嚟都未爆過粗，所以足以證明佢嘅為人。而11號馮嘉敏被爆疑似患癌，仲喺4月時做完手術令臀部留有疤痕，對此馮嘉敏話而家自己身體已經康復，仲話4月發現嘅時候好在係良性，所以即時安排手術切除咗。

另外，有個別人士對於港姐泳裝環節嘅惡意不實指控，TVB已發出聲明強烈譴責，而港姐大會統籌經理何小慧就話一切未受事件影響。