阿Bob指朱晨麗天生啜波嘴 何依婷上《獎門人》預咗濕身

節目《開心無敵獎門人》有唔少經典遊戲，呢日台慶劇《美麗戰場》一眾演員，就踩上獎門人挑戰啜乒乓波，而劇集監製葉念琛都有到場觀戰。

一眾女藝人都嘟晒嘴落力吸波，不過有人輕鬆過關，有人就啜極都啜唔到。對於啜波嘅技巧，阿Bob林盛斌就話完全係取決於個嘴型！佢仲話朱晨麗個嘴正正就係「啜波嘴」，只要用力一吸就可以吸到個乒乓波，而喺阿Bob隔離嘅朱晨麗都笑住話：「我平時都鍾意吸，吸錢呀！」

對於要玩遊戲，劉佩玥就話一啲都唔緊張，仲話會全情投入去玩，打算同陳瀅等用聲波去取勝，而陳曉華就話好在今次自己係同陳瀅同一組，因為佢話對方係智慧嘅代表喎！

而第一次上《獎門人》嘅何依婷、蔣家旻同黎芷珊，就話對住隔離隊有經驗嘅老手，佢哋都有啲緊張，仲話希望到時獎門人可以鬆手少少。對於節目入面有機會濕身，何依婷就話已經早有準備帶定咗幾套衫啜替換，而黎芷珊就話自己已經着定泳衣打底。