修哥胡楓早前不幸中招，令到佢本第喺中秋節舉行嘅演唱會，要延期去到11月先舉行。休養咗十幾日已經好返嘅修哥，呢日就現身交代身體狀況。

佢話雖然不幸確診，但係開心嘅係喺佢休養期間，有好多親友都有打電話或者send短訊畀佢慰問，修哥又話好多人會覺得要隔離十幾日會好悶，不過佢就有調整好心態，呢段時間雖然連房都唔敢出，但係修哥話自己都有喺房入面行吓唱吓歌，有時食完藥眼瞓又會恰吓咁，最重要嘅係佢日日都有唔同人同佢視像通話，好似孫仔、曾孫，喺海外嘅仔女同朋友咁，所以啲時間好快就過。

講到演唱會延期去到11月，修哥就話呢段時間會Keep住行路唱歌練氣，問到佢係咪會減少外出？修哥就話因為出街見到個天，可以令到佢心情舒暢，所以自己會照樣出街，但就會減少去人多嘅地方。講到身處喺英國嘅契女林憶蓮，之前就因為檔期問題趕唔到返香港撐契爺場，問到而家演唱會延期，憶蓮會唔會可以返嚟撐場？修哥就話唔想打擾對方，所以一齊都順其自然，但佢就有透露喺佢休養期間，憶蓮有打畀佢問候。

對演藝界貢獻良多嘅修哥，獲頒世界傑出華人藝術家大獎，修哥就話自己對呢個獎受之有愧，因為佢都質疑自己係咪擔當得起「傑出華人」嘅稱嘅號，不過對於獲獎，修哥當然係非常開心，仲話雖然自己已經年屆90，但拎獎後會繼續努力，因為佢對工作仲係相當有熱誠呀！

一連四場填詞人鄭國江作品展演唱會，呢晚嚟到尾場，陳潔靈、林志美、曾路得、區瑞強、李龍基及葉振棠先後上台獻唱，尾場獲胡楓現身捧場。一連兩晚擔任嘉賓嘅陳潔靈，呢晚帶領全場大合唱《隨想曲》，佢更向鄭Sir致敬！