一眾《愛‧回家之開心速遞》演員呢日參加秋祭野餐宣傳活動，由「龍家」及「洪家」嘅演員率領大家炮製野餐食物，劉丹同「阿蟹」呂慧儀戲裡戲外感情要好，丹爺說：「阿蟹、阿滕(滕麗名)、我細佬(單立文)佢哋幾個係主要搞手，因為我對食嘢冇咩研究，你整一餐齋蕃薯芋頭，我都鍾意食。」身旁嘅呂慧儀大讚丹爺為人好隨和。

丹爺兒子劉愷威最近參加中年男士選秀節目，見阿仔重拾久違嘅歌手身份，丹爺亦有留意阿仔喺中秋晚會嘅演出，不過丹爺話：「另外嗰個節目，我唔知咩台，所以睇唔到，我都想睇！」呂慧儀說幫阿爸喺手機整，方便睇「阿哥」演出，不過丹爺話：「唔得！細得滯。」

大小姐林淑敏喺劇中不時有靚衫著，早前整模仿電影《賭神》嘅西脇美智子經典造型，連劇中爸爸「大龍生」羅樂林都激讚神似：「之前拍我見唔到，不過出街嗰陣我見到，出嚟好正！我哋個年代拍賭片都有呢啲誘惑人嗰個(造型)好有氣勢。」林淑敏則指梳頭化妝幫忙好大。

「龔水CP」呢日著情侶裝現身，張景淳被問消失宣傳一段時間，近期先回歸頻密現身，張景淳承諾之後多啲跟觀眾見面，感謝大家支持，佢透露目前拍緊嘢：「劇集keep住有拍，有啲廣告商活躍番，有做一啲外面嘅job，大家只愈來愈見到我。」

處境劇《愛·回家之開心速遞》嘅一眾演員劉丹、單立文、呂慧儀、滕麗名、周嘉洛等呢日為劇集宣傳，眾人擺出多個網上熱門合照pose畀傳媒影相，做訪問嘅時間兩位孝順女呂慧儀同滕麗名仲不停幫爸爸劉丹按摩，成家人相當溫馨。

呢日宣傳以Thanksgiving為主題，呂慧儀就話好感恩有劇中嘅呢班家人，仲話因為大家相處咗好多年，感情猶如真嘅屋企人一樣。講到同張景淳喺劇中嘅龔水CP即將合體，呂慧儀就話希望可以快啲，因為自己都好想快啲拍CP線呀。

至於劇中另一對CP陳浚霆同古佩玲，戲裡戲外都一樣咁sweet，問到佢哋現實中有冇機會發展？佢哋就異口同聲話多謝大家，又話想發展咗劇中兩人嘅感情線先，至於現實就先努力發展事業呀！