黃子佼爆Sandy懷孕有跡可尋 台灣未玩夠暫未打算飛外地

啱啱升任老竇幾個月嘅黃子佼，仲沉醉喺做Daddy日日同前世情人相聚嘅興奮當中，而佢老友吳姍儒日前宣佈懷孕，原來佼佼一早已經發現線索，仲話八月傾偈講到生小朋友時Sandy已讀不回，當時露出端倪已經有跡可尋咁話喇。

呢日佢話當時搵Sandy係有事相求，希望對方開金口獻唱歌曲敬師，而家知道Sandy當時有孕，就覺得非常唔好意思呀。

除咗香港會放鬆隔離防疫政策之外，香港人嘅旅遊熱點台灣一樣將會以「0+7」方式開放出入境，不過佼佼呢日就話暫時未有出門計劃，因為就連本地都未玩夠，所以暫時會繼續喺台灣唔同地方玩咁話喇。

有份入圍金鐘獎兩個獎項嘅佢，又話自己今年信心十足，所以已經準備定兩套戰衣，因為當晚可能要行兩次紅地毯呀。