港姐競選嘅泳裝環節,日前被監警會委員喺會議批評,事後引起廣泛討論,而呢日薛家燕現身一個活動時,就認為選美有泳裝環節非常合理,認為選美除咗外貌同智慧學識之外,身形都係非常重要一環喇。
家燕姐又話大家如果以審美眼光,正常咁檢視參賽佳麗,無論中外都會以體態美作為選美嘅一個環節咁話,反而看待呢件事嘅睇法更為重要呀。
細細個童星年代已經同胡楓認識嘅家燕姐,對修哥嘅演唱會將延期到11月重新舉行,就話修哥柒疫康復後非常精神,仲話佢同其他嘉賓已經排練妥當,就當表演當日同修哥一齊上台為大家獻技咁話。
而日前佢同幾位相識幾十載嘅七公主成員,一齊現身蕭芳芳亡夫張正甫嘅追思會,當日芳芳姐依然非常哀痛,令外界非常擔心。呢日家燕姐亦都有透露多年老友嘅情況,仲話張正甫希望太太同身邊朋友都保持快樂好好生活呀。