鄭伊健同周家怡呢日出席新戲首映，鄭伊健受訪時稱同後生女合作拍攝初期怕有代溝，後嚟大家一齊解決拍攝上嘅問題，彼此有默契後，片場立即變得好嘈，講起港產片再度捲起熱潮，港片票房大賣，被問有冇感到壓力，周家怡希望乘住個勢，有多啲人入場睇，支持本土電影，鄭伊健坦言之前受疫情影響：「有得上已經好好，呢幾年上嘅戲比較少，當然希望多啲人睇，至少上年嘅作品，今年有得睇，有啲作品到而家都未出現過。」

張敬軒鮮有拍戲，原來最近忙緊拍新戲，佢今次挑戰唔少動作戲份：「其實拍緊啦，順利又整個過程好開心嘅，有好多動作場面，有爆破嗰啲，幾好玩，有整傷條腰不過唔關套戲事，搬嘢跣腳。」軒仔透露今次盡量唔用替身，有啲場口要親身上陣。

提及BOYZ成員張致恆捲入負面新聞風波，返內地登台唱《死性不改》狂走音，張致恆事後回應稱自己冇實力，自知唱得好難，軒仔被問此事，佢無奈寄予張致恆作為一位artist要先學做人，佢續道：「覺得呢個比較重要，點樣喺生活當中，喺工作當中，點樣做一個負責任嘅角色，對工作團隊、對家人、對各方面都係，要自己嘅表演做得好之前，首先自己要係一個有責任心嘅人，我會睇重呢樣嘢。」

張敬軒 原定去年舉行嘅11場Side Track演唱會，呢日終於正式式開鑼，舊年因為確診而無奈延期嘅表演，經過調整歌單同加入新元素之後正式同歌迷見面，軒仔一開場就同大班Dancer勁歌熱舞一番揭開表演序幕。

事隔大半年之後，軒仔喺第一場就出盡力為台下苦等歌迷獻技，仲因為場館未有超時罰款規定，最終Encore足足3次先完場。軒仔亦分享當時確診嘅心情，仲形容為好似有咗BB咁，更加妙喻當時嘅經驗呀。