張致恆內地登台狂走音自認難聽 張敬軒寸:做一個artist要先學做人

張致恆內地登台狂走音自認難聽 張敬軒寸:做一個artist要先學做人

鄭伊健同周家怡呢日出席新戲首映,鄭伊健受訪時稱同後生女合作拍攝初期怕有代溝,後嚟大家一齊解決拍攝上嘅問題,彼此有默契後,片場立即變得好嘈,講起港產片再度捲起熱潮,港片票房大賣,被問有冇感到壓力,周家怡希望乘住個勢,有多啲人入場睇,支持本土電影,鄭伊健坦言之前受疫情影響:「有得上已經好好,呢幾年上嘅戲比較少,當然希望多啲人睇,至少上年嘅作品,今年有得睇,有啲作品到而家都未出現過。」


張敬軒鮮有拍戲,原來最近忙緊拍新戲,佢今次挑戰唔少動作戲份:「其實拍緊啦,順利又整個過程好開心嘅,有好多動作場面,有爆破嗰啲,幾好玩,有整傷條腰不過唔關套戲事,搬嘢跣腳。」軒仔透露今次盡量唔用替身,有啲場口要親身上陣。


提及BOYZ成員張致恆捲入負面新聞風波,返內地登台唱《死性不改》狂走音,張致恆事後回應稱自己冇實力,自知唱得好難,軒仔被問此事,佢無奈寄予張致恆作為一位artist要先學做人,佢續道:「覺得呢個比較重要,點樣喺生活當中,喺工作當中,點樣做一個負責任嘅角色,對工作團隊、對家人、對各方面都係,要自己嘅表演做得好之前,首先自己要係一個有責任心嘅人,我會睇重呢樣嘢。」

張敬軒被粉絲催著泳褲謝票 被製作AI片騙案感細思極恐

張敬軒 完成新加坡工作返港冇耐,呢日就現身活動同10位幸運Fans飯聚一番,不過大家就當然醉翁之意不在酒,除咗享受同偶像共處時光外,更不忘追問軒仔幾時先肯找年初嘅「叱吒我最喜愛男歌手獎」數,仲要求佢著泳褲謝票。

對於大家嘅大膽要求,軒仔就話:「夏天要到喇,等我身體準備得好啲先!」而且軒仔更希望謝票活動可以做得有意義又認真啲,唔係胡鬧完成。不過當軒仔被問,想著咩款式泳褲時,佢又回復鬼馬本性:「我都係一個游泳好手,所以以喺水入面嘅擴張能力最細嚟計,咁都係三角褲。」令在場傳媒都紛紛嘩然。

雖然軒仔一直都行開斯文路線,不過佢都曾經有「性感」一面,就係為舞台劇拍攝全裸海報,佢仲呼籲大家上網搵返張相睇,欣賞下佢副好Body。雖然過去輝煌過,但被問道會唔會操得返好似當年咁勁時,軒仍就話:「人生有願望係好事。」

網上AI騙案日漸猖狂,就連軒仔都成為目標,被騙徒以AI同Deep Fake技術整製作英文訪談片呃人錢,呢日軒仔都話成件事完全細思極恐,仲話騙徒連佢嘅圍頭口音都改埋變澳洲口音。不過問到有冇叫媽咪小心啲時,軒仔就大派定心丸話:「我阿媽連我都唔信架,放心!」而軒仔亦透露,有Fans不慎被騙,損失金額可觀。

 相關推薦

熱門搜尋