葉念琛帶阿寶殺入公仔箱 打造角色幫陳瀅𣈴準視后

眾所周知葉念琛執導嘅電影女主角都係叫阿寶，呢個習慣即使係喺佢監製電視劇上都冇變。由葉念琛監製、編劇同導演嘅無綫55周年台慶劇《美麗戰場》，陳瀅所飾演嘅女主角亦係叫阿寶——鍾家寶。

陳瀅早前喺古裝喜劇《痞子殿下》入面嘅演出為觀眾帶嚟驚喜，亦令觀眾對佢喺《美麗戰場》嘅演出有所期待。今次陳瀅就要挑戰由 18 歲演到中年，性格亦由善良重情倔強嘅鄰家女孩，脫變成歷盡風霜、受創傷嘅當紅女星，角色甚有挑戰性。為咗深化阿寶呢個角色，陳瀅坦言花咗唔少心思喺造型設計上，佢仲主動同葉念琛爭取，演繹阿寶少女時期時以全素顏上陣，為嘅就係突出角色嘅對比。至於服飾方面，陳瀅亦出動唔少私伙靚衫，除咗阿寶年青時嘅打扮似足陳瀅現實中嘅裝束外，劇中阿寶做咗藝人之後嘅造型，陳瀅亦都參照咗偶像 BLACKPINK 嘅某啲造型：「我好希望大家會鍾意阿寶啲衫，因為好多都係我揀。同埋有黑絲襪嘅造型都係我諗，因為我好鍾意，主要因為顯瘦。」

一連二十集嘅《美麗戰場》將會喺 10 月 3 日播出，呢日官方就釋出最新宣傳海報，當中飾演阿寶嘅陳瀅，以性格打扮配以高冷眼神企喺C位，至於飾演佢好姊妹林小美嘅陳曉華、演李靜兒嘅劉佩玥、劇中演繹妹妹鍾家琪嘅蔣家旻、扮演龐氏千金嘅何依婷同埋演唐昕嘅朱晨麗，就分別穿上唔同款式嘅黑色晚裝背向鏡頭。

陳曉華喺劇中飾演性格天真嘅花癡小美，佢話呢個角色對佢嚟講係超難：「雖然我有經歷過花癡時候，但因為而家已經唔係花癡，要我變返以前細個咁都幾難，要刻意重拾番以前好多回憶。」至於阿Moon劉佩玥嘅角色靜兒，就係一個義字當頭嘅「女漢子」，每次阿寶/小美畀人恰就會第一時間衝出嚟護航，不過講到角色，阿 Moon就對葉念琛有啲微言喇！佢話：「導演攞咗我某啲特質去做個角色，好似豪爽呀、信朋友信到有啲蠢呀，我明明好醒架嘛。」

《美麗戰場》 10 月 3 日起 逢星期一至五 21:30 翡翠台