司儀大賽藝人同事爭出線 各出奇謀奪台慶主持榮耀

由一班唔同年資同經驗同事參與嘅《全能司儀選拔大賽2022》，呢日為決賽錄影，擔任主持嘅鄭裕玲、林盛斌同陸浩明嘅主持經驗都非常豐富，仲會以唔同方式考驗一班入圍參賽同事呀。

話晒勝出嘅兩位都將會參與今年台慶嘅主持工作，呢日Do姐佢哋就話會全方位考驗佢哋嘅功夫，而6號就話當中環節一啲都唔易呀。阿Bob就話參賽者都過五關斬六將之後先晉身決賽，相信佢哋會以最好一面出戰喇。

除咗主持次外，就連評判都一樣非常資深，好似旦哥鄭丹瑞、阮兆祥同森美就有唔同嘅評選準則喇，要識搞氣氛又要執生，仲要有個人風格，聽落真係一啲都唔簡單呀。

主持六合彩攪珠出晒名嘅蔡國威，同梁珈穎都一樣有主持經驗，不過佢哋過往就各有唔同範疇，威仔就話信心對比賽同主持工作一樣非常重要咁話。娛樂新聞台嘅現任同離任同事都一樣有參與，好似黃建東、吳紫韻同王鎮泉都係參賽者，今日變成戰友，佢哋就話會互相支持喇。

至於經驗相對冇咁多嘅黃頌明同梁菁琳就話，希望多啲吸收唔同經驗，仲想學吓真正節目主持嘅經驗呀。