劉浩龍連環錯過桃花年破Dry無望？ 蘇民峰批欣茵行30年財運

由郭偉亮（Eric Kwok）、方力申、J2ers陳欣茵主持嘅J2節目《鋪鋪Poker》，聽晚播出第一季最後一集，呢集搵嚟蘇民峰、劉浩龍擔任嘉賓，劉浩龍將接「榮休」嘅小方棒，成為第二季主持！

蘇民峰為單身嘅劉浩龍算桃花，指佢喺2016至2021年有數個桃花年，只係佢錯過咗，師兄聞言不禁感嘆：「即係完結咗囉！」蘇師傅指劉浩龍下一個桃花年，要等到2025年蛇年，師兄即表現「疊埋心水」努力做嘢。

J2ers陳欣茵亦爭取良機，問及自己嘅事業運，蘇師傅笑言：「就嚟否極泰來，衰多幾年先啦，哈哈!」蘇師傅叫欣茵唔需要太擔心，皆因佢29歲後會行30年財運，行運更會行到59歲，明年2023年仲係佢嘅重桃花年，可能遇到「白馬王子」！

 蘇師傅喺節目自認賭運麻麻，「呢10年輸足9年半」，蘇師傅大手拋勵志bite，話成日勸人哋就算開局嗰時好差，好似二、三十歲一事無成，但一日未到最後，都唔知結局係點，蘇師傅除咗口才了得，更觀察能力相當頂級，喺節目大晒「觀人」之術，多番睇穿欣茵底牌，再獲Ricky大讚「師傅Read人好勁」，想知道「勁到冇朋友」嘅蘇師傅，最終能否成為第一季最終回大贏家，記得留意！