《美麗戰場》製作特輯 劉佩玥陳曉華閨密情變質

《美麗戰場》製作特輯 劉佩玥陳曉華閨密情變質

葉念琛監製、執導及編劇嘅台慶劇《美麗戰場》,葉念琛今次搵咗陳瀅飾演「阿寶」,身邊有兩位好閨密陳曉華同劉佩玥,由互相扶持,後嚟割捨「姊妹情」,各為其主,令呢三位好姊妹感情變質。

劉佩玥飾演個性衝動又講義氣嘅「李靜兒」,當佢知道要演十幾歲嗰陣,心情有啲糾結,直至三個女仔一齊睇劇本同排戲,忽然覺得青春感覺返晒嚟。

陳曉華則飾演貪靚又戀愛腦嘅「林小美」,角色喺三個人當中比較腍善、比較弱嘅女仔,而丁子朗今次要做渣男,跟「林小美」拍拖,又背住「林小美」偷食女友身邊嘅朋友;新人Aska張馳豪亦有參與演出,飾演「區家明」同「阿寶」發展一段戀情。

 《美麗戰場》10月3號起 星期一至五 21:30 翡翠台


麥明詩盛勁為舉辦婚宴 林作媽媽現身送祝福

麥明詩同盛勁為喺3月24號擺酒舉行婚宴,獲馮盈盈、鄭衍峰、同麥大力擔任兄弟姊妹團,一對新人甜蜜咀嘴,幸福滿瀉,Louisa喺結婚過程中多次開心到喊,好多朋友更祝福佢哋早生貴子,佢哋都話有呢個計劃,仲話會趁婚假養精蓄銳為生BB做足準備。

而呢晚劉佩玥、吳業坤、江美儀、陳庭欣、戴祖儀、郭子豪、鄧卓殷、丁子朗、洪永城、唐詩詠、黃德斌、翁嘉穗同老公都有到賀,但最驚喜嘅莫過於係Louisa舊愛林作嘅媽媽王莉妮現身,原來佢係以Louisa契媽身份送上祝賀,佢更大讚盛勁為好靚仔好型,自己個仔完全比下去,林媽媽仲話覺得好可惜,之前一直好想阿仔箍煲,最終事與願違。不過林媽媽阿仔都有託佢向Louisa送上祝福。

林作同裕美日前post出結婚相,問到林媽媽囝囝係咪都好事近?林媽媽竟然話林作影婚照係因為受到刺激,仲話自己安慰阿仔叫佢睇開啲,至於講到會畀裕美呢個準新抱幾多分?林媽媽似有難言之隱,只係話佢合格咋。

盈盈見證住好姊妹Louisa覓得真愛都好戥對方開心,佢仲話喺一對新人之間嘅互動,已經感受到佢哋係有幾恩愛,佢仲大讚兩人係最佳拍檔。至於兄弟之一嘅麥大力,之前喺美國滑雪傷腳,雖然仲要撐住拐杖,但大力都堅持上陣,認真唔話得,而Leonard就分享咗兩人相處嘅小趣事。

而啱啱再榮升做爸爸嘅洪永城,就再次同大家分享喜悅,佢仲話細女似媽咪多啲,而大女見到妹妹都好開心,仲鍚咗妹妹一啖添。

 相關推薦

熱門搜尋