陳偉霆唔敢喺張家輝面前認大隻 譚俊彥恐與囝囝面試被當罪犯

張家輝同林超賢相隔8年再合作，夥拍陳偉霆、譚俊彥同楊祐寧等拍攝動作電影《爆烈點》，之前家輝因為親身上陣拍攝一場由天橋跳落地面嘅動作戲，不慎扭傷腳，好彩傷勢唔算嚴重，家輝養好傷後就繼續投入拍攝，呢日佢哋就喺中環拍攝兼畀傳媒探班。
講到腳傷問題，家輝話行路就冇問題，但係如果要跑就仲未得，佢仲話因為導演林超賢要嘅跑，根本唔可以係慢跑，而係要跑到演員氣絕身亡嘅跑嚟。

為咗今次個角色，陳偉霆專登戒食糖同碳嚟操弗，點知導演臨時同佢講喺戲內可以唔使除衫，所以令佢冇顧忌放縱咁食，點知喺佢食咗幾日之後，林超賢就突然要佢拍除衫戲，令到陳偉霆相當無奈。企喺隔離嘅張家輝即安慰，讚佢已經操到好大隻，但陳偉霆就話自己同對方喺電影《激戰》入面個身型冇得比，佢仲話因為咁而好大壓力，唔敢喺家輝哥隔離話自己練到好大隻。

今次喺電影入面做奸角嘅譚俊彥，透露自己嘅打戲佔咁劇本嘅8成，佢笑言拍林超賢嘅戲就好似玩三項鐵人一樣咁辛苦，而為咗準備好自己嘅皮膚顏色、身型同狀態，譚俊彥話都花咗好一段時間去準備，仲話希望自己體能上仲可以應付到連場嘅動作場面。由於譚俊彥而家成個造型都入形入格，令佢喺生活上就帶嚟咗少少唔方便，佢話好似早前同囝囝去小一面試，就好擔心校長會以為有個罪犯嚟咗，而佢啲小朋友亦都有投訴，話譚俊彥啲鬚太拮而唔佢畀錫。

至於台灣藝人楊祐寧，就話因為知道套戲有張家輝，所以冇問太多就直接答應，講到要同囡囡分隔兩地，楊祐寧就話囡囡因為有媽媽陪喺身邊，所以都還好，自己每日都會同佢視訊，楊祐寧仲話係好唔捨得要同囡囡分開咁耐，但為咗要搵錢所以冇辦法。