張孝全相隔十年再角逐金馬影帝 江宜蓉新片挑戰大尺度情慾戲

相隔十年張孝全再憑電影《罪後真相》入圍金馬獎角逐影帝殊榮，呢日佢同江宜蓉出席另一新片《童話ㆍ世界》嘅記者會時，就坦言可以再入圍金馬覺得非常榮幸，又話知道其他入圍者都好優秀，所以佢覺得能夠入圍就已經係一個肯定。講到同十年前入圍嘅心情比較，張孝全話一定係當年比較激動同緊張，而家佢就少咗份緊張，但同樣咁開心。

講到今次新片包含師生戀、法庭戲等，而當中飾演女高中生嘅江宜蓉仲會有大尺度嘅激情床戲，對於心態上嘅拿捏，江宜蓉就話因為戲中唔係要暴露肌膚嘅尺度，反而係着重點樣呈現情慾嘅感覺，所以拍之前都同導演傾咗好耐。而今次喺戲中做律師嘅張孝全，話拍攝上最難嘅係就對白，因為好多都係專業用詞，加上導演本身亦係一位律師，所以對啲用字尤其敏感，令到佢哋成日都會因為對白問題而NG。

講到4歲嘅囝囝已經入讀幼稚園，張孝全話自己都有向囝囝灌輸性知識，又話有開始教佢打拳嚟保護自己。