古天樂《明日戰記》票房破6600萬 確定奪《寒戰II》冠軍寶座

由古天樂與劉青雲主演嘅科幻電影《明日戰記》上映六個星期，票房屢創新高，日前公佈票房衝破6624萬，有望打破2016年《寒戰II》6682萬紀錄，登上香港最賣座華語片冠軍，古天樂同劉青雲呢日去戲院謝票，感謝大家支持，古天樂對票房達7000萬好有信心，好友劉青雲稱有需要便現身謝票，順便同今個月21號生日嘅古仔慶祝，希望屆時雙喜臨門！

古天樂坦言票房過7000萬，對於佢同香港電影嚟講都係好好嘅禮物，古天樂亦透露之後陸續派「福利」釋出其他刪減片段來答謝大家，被問前傳同續集係咪要等兩、三年時間，古天樂指動畫唔使等咁耐，其他則稍後再公佈。

講到黃子華主演嘅港產片《飯戲攻心》票房達5000萬，古天樂稱有留意：「前日睇《飯戲攻心》謝票，見佢有感觸落淚，又話唔敢超越《明日戰記》，喺疫情期間，我哋係好需要正能量，好需要笑容，而家疫情開始放緩，喜劇可以帶畀大家歡笑，除咗笑之外，就係點樣走出困境，《明日戰記》係第一齣科幻片，拍呢套戲雖然好艱難，因為第一部先可以學識點去進步，去做更加好嘅科幻片，我見到港產片《飯戲攻心》、《闔家辣》、《緣份山旮旯》、《我媽有咗第二個》、《明日戰記》，其實港產片呢排漸露曙光，最重要係大家觀眾支持，作為同業，有可以有進步。」