香港樂壇新人輩出,不過年紀就似乎有年輕化趨勢,不過除咗年輕人要追夢之外,成年人何嘗又唔想一圓心中嘅夢想呢?TVB嘅新節目《中年好聲音》呢日舉行首輪面試,就吸引咗一班有志者齊齊到場喇。
除咗有年前喺屯門無人不曉嘅娜娜以最近至潮嘅一頭Shocking Pink出現,仲有參賽無數、富有閱歷嘅各路人馬現身,正所謂高手在民間,唔知又有邊位最後會脫穎而出呢。
呢日面試評審就有經驗豐富嘅肥媽、啱啱評選完《聲夢2》嘅張佳添等音樂人參與,而曾志偉亦都現身現場,仲話聽完唔少參賽者嘅故事之後,都希望節目可以幫佢哋一圓夢想呀。志偉又話目前已經有成500人報名,有興趣又未報名嘅朋友就記得星期五深夜截止前出手,咪錯過今次機會喇。
呢日亦都有星二代同曾出道嘅歌手現身,好似張名敏嘅公子張頌華、曾以組合形式出道嘅周吉佩、曾經鬥贏Sammi鄭秀文嘅專業配音員何國星、仲有前輩歌手姚志漢,加上曾過出過碟嘅林千豔,評判張佳添嘅同學羅金榮等等,佢哋都對今次比賽有好大期望呀。
而有份喺面試把關嘅張家誠、劉易昇同徐洛鏘就話非常欣賞參加者嘅精神,亦都因為呢日參與者眾,所以只得好少時間可以俾佢哋表現,所以話非常唔好意思咁話。