《下流上車族》道港人悲歌 林敏聰處男下海嚴肅地搞笑

台慶劇《下流上車族》將喺10月17號起，緊接《夢華錄》推出， 新劇係有得才之稱嘅林敏聰首次演出劇集之作，所以尚未開播就已經引起高度關注喇。出名搞笑嘅阿驄將聯同飾演佢太太嘅江美儀，仲有兩位靚女千金郭柏妍同羅毓儀演盡港人上車悲歌，劇中亦有好戲之人；金像影后鮑起靜坐鎮。

劇組日前公開兩條宣傳預告片，首條預告片中飾演車志明嘅阿驄，一改平時無厘正經本色，語重心長地道出港人上車悲歌話：「人與人之間最遠嘅距離係咩？ 就係你睇到嘅靚樓，你買唔到、住唔起呀！」而親情同人味亦係《下流上車族》嘅賣點，宣傳片中出現阿驄爆喊鏡頭，又大拋押韻Bite：「間屋企幾細唔係問題，最緊要一家人喺埋一齊！」

至於另一條宣傳片，阿驄開首就一句「落錯車14 年，我無時無刻都諗住買番間屋」相信已道盡唔少港人嘅心酸事，片中「車家」為咗上車各出奇謀，阿驄去果欄搬貨賺錢、郭柏妍化身地產妹踩滑板派傳單等。

不過當中最吸引應該係郭柏妍同羅毓儀齊齊以女僕Look去Cafe打工，造型非常可愛。之前憑《黯夜守護者》學生妹一角再惹關注嘅羅毓儀，今次喺台慶劇同樣有唔少發揮機會，喺宣傳片中一個女仔瞓天橋底之餘，仲引嚟一班流浪漢圍觀，畫面喜感十足。 阿驄今次除咗為「處男劇」粉墨登場之外，更親自為劇集主題曲《一家人》作曲填詞，仲邀請咗《聲夢傳奇》嘅Aeren文凱婷合唱。阿驄早前喺社交平台公開錄音花絮，Aeren對阿驄緊張到狂搣手指。

而阿驄就自爆幾乎趕唔切完成歌曲，佢話：「到咗最後嗰日，我又有番少少靈感作到頭嗰幾句，咁咪作埋佢啦。呢個貫徹到我創作風格，就係你畀一年我，我都係最後嗰一日先做。」阿驄又大讚Aeren冇得頂，完全符合佢想要嘅感覺，又叫監製要搵Aeren拍劇。而Aeren就指今次同前輩合作令自己獲益良多：「以前都係一班人錄，今次感覺好唔同。」而《下流》嘅插曲同片尾曲亦同樣由阿驄親自操刀，即將會陸續公開。

《下流上車族》10月17號起 星期一至五晚 20:30 翡翠台