洪嘉豪西九戶外開處男騷 11月連開兩場緊張腳震

早前先同老友MC張天賦合體再開騷嘅洪嘉豪，當時喺現場宣佈會首次展開個人表演，話咁快相關嘅細節同場地就已經公佈喇，嘉豪11月就會喺西九文化區一個戶外場地連開兩場處男個唱，呢日佢仲為演唱會拍攝宣佈海報喇。

第一次個人騷就要每晚面對成7千觀眾，本來已經夠晒緊張，但係當加埋內部認購閃電爆滿之後，嘉豪就話緊張程度已經去到腳震級，仲有四方八面嘅朋友求飛訊息，就令佢更加唔知點算好喇。

同時已經落力操肌嘅佢，就話唔係為咗要騷而操，只係為咗有更好狀態同大家見面，仲話正式展開籌備工作，先知原來一個音樂會嘅繁複程度咁龐大呀。