新婚一個月嘅連詩雅，呢日獲邀參加頒獎禮。由於婚後同老公陳家樂各有各忙，所以蜜月之旅Shiga就話未定到幾時去，仲話有機會係去個三日兩夜嘅短暫旅行就算呀。提到身邊唔少朋友都已經生咗小朋友，Shiga笑言都聽咗唔少「有用資訊」，不過自己就唔太急切，所以一切都係順其自然呀。

對於早前曾透露會同好姐妹黃翠如同陳自瑤一齊拍攝旅遊節目，Shiga呢日就指仲有好多嘢未落實，但自己就好期待，希望可以快啲成事呀！雖然同好姐妹嘅旅行節目未知幾時開拍，但Shiga就透露嚟緊會去馬來西亞工作，屆時仲會舉行fans見面會呀。

同場嘅鍾雨璇就自爆早前畀師傅批家庭運一般，佢話最近家宅真係有啲不靈，除咗自己同媽媽早前不幸確診外，媽媽仲畀診斷出有血管性水腫，而佢嘅愛貓亦有不適，自己又喺活動上不慎扭傷腳，可以話相當黑仔呀！