鄭伊健紅館騷前率小師弟妹開live熱身 向Jay Fung釗峰邀歌

鄭伊健將於11月21至24號及26至27號，開六場紅館騷，開賣4個鐘火速售罄，反應熱烈，除咗撲飛去紅館睇騷之外，仲可以搶先喺10月9號(周日)晚上9點，喺TVB娛樂新聞台Facebook專頁，收睇鄭伊健率領梁釗峰、Jay Fung、黃淑蔓（Feanna）同Cloud，舉行《Media Asia X Highlighter Music Gig Online》。

拍攝當日，伊健提早抵達現場，為咗聽幾位實力非凡嘅小師弟妹表演，伊健對佢哋講：「我早啲嚟係想聽你哋唱歌，我聽得好開心，好似睇緊演唱會。剛才我仲同Feanna同Cloud合唱，其實開過咁多次演唱會，從來都冇機會唱呢首歌，今日係第一次。之前我哋一齊拍咗套電影《深宵閃避球》，大家有咗默契，所以我專登揀呢首歌一齊唱，至於咩歌要大家估吓先！」

同場嘅Jay Fung稱好開心：「可以同伊健一齊jam歌，可惜冇機會只有我哋兩個合唱。我好想寫歌畀你，你會唔會唱？」伊健興奮地話：「係咪㗎？我驚我唱唔到，不如你兩個（Jay Fung、釗峰）一齊作歌，寫一首我哋幾個合唱嘅歌，有男聲有女聲，幾好呀！」

音樂會尾聲，幾位師弟師妹向伊健送上寫著「一生幸福」嘅日本清酒，預祝伊健11月紅館演唱會成功，Feanna同Cloud趁機會向大師兄講出心裡願望，希望25歲前可以去紅館表演，自薦做演唱會嘉賓，伊健稱邀請演唱會嘉賓呢個重任，由音樂監製陳光榮負責，Feanna並冇放棄：「唔緊要嘅，我會嚟睇，我要坐第一行，同你say hi，你記得同番我say hi喎！」